BEDA
ure lareow awrát on ðære
bec þe is geháten historia anglorum. be sumes mannes
æriste. on ðisum iglande. þisum [wordum reccende;
On
ðam timan wæs sum ðegen drihthelm gehaten on norðhymera
lande /bylewite on andgyte. gemetegod on þeawum. eawfæst
on life. and his hiwrædene to þam ylcan gewissode;
Ða
wearð he geuntrumod. and to ende gebroht; He ða gewat on æfnunge
and his lic læg ealle þa niht inne beset. ac he aras of
deaðe on ærnemerigen;
He
ða hi gefrefrode. and cwæð; Ne beo ðu afæred
for þam þe ic aras of deaðe; Me is alyfed eft to libbenne
mid mannum. na swa þeah swylcum life swa ic ær leofode;
He
aras þærrihte. and eode to cyrcan. and þurhwunode
on gebedum ealne þone merigen; Dælde syððan his
æhta on þreo. ænne dæl his wífe. oðerne
his cildum. þriddan þearfum;
Forlet
syððan ealle woruldþing. and beah to ðam mynstre
þe is magilros gehaten. and wearð besceoren. and þam
abbode aðelwolde underþeodd.
and
be his lare his lif adreah on sumere digel/nysse on micelre forhæfednysse
modes and lichaman. oð his lifes ende;
He
sæde his gesyhðe þære leode cyninge ælfride.
and gehwylcum eawfæstum mannum þus reccende;
Me
com to an scinende engel on ðam æfene þe ic gewat.
and gelædde me to eastdæle suwigende;
Ða
become wyt to anre dene seo wæs ormætlice deop and wid.
and fornean on lenge ungeendod; Seo wæs weallende mid anðræcum
ligum on anre sidan. on oðre sidan mid hagole and grím/licum
cyle. blawende butan toforlætennysse;
Seo
dene wæs afylled mid manna sawlum. þa scuton hwiltidum
of þam weallendum fyre. into ðam anþræcum cyle.
and eft of ðam cyle into þam fyre. buton ælcere toforlætennysse;
Ða
þohte ic þæt þæt wære seo helle
þe ic oft on life embe secgan gehyrde. ac min lateow andwyrde
þærrihte minum geþance. and cwæð nis þis
wite seo hel ðe þu wenst;
Se
engel me lædde þa furþor to anre þeostorfulre
stowe. seo wæs to þan swiðe mid þiccum þeostrum
oferþeaht þæt ic nan þing geseon ne mihte.
buton mines latteowes scinende hiw. and gewædu;
Efne
þa færlice æteowdon gelomlæcende ligas. sweartes
fýres upastigende and min latteow me þær ana forlet
on þam þeostrum middum;
Ic
þa beheold þone ormætan lig. þe of þære
neowelnysse astah;
Se
lig wæs mid manna sawlum afylled. and hi asprungon upp mid þam
fyre swa swa spearcan. and eft ongean into þære nywelnysse.
and þær sloh út of þære nywelnysse
ormæte stenc mid þam æðmum. se afylde ealle
þa þeosterfullan stowe;
Ða
ða ic þær lange stod. ormod and ungewiss mines færeldes.
þa gehyrdde ic þæt þa deoflu gelæddon
fif manna sawla hreowlice gnornigende and grimetende into þam
sweartum fýre;
Sum
ðæra wæs preost. sum læwede man. sum wimman.
and þa / deoflu scegdon hlude hlihende. þæt hi ða
sawla for heora synnum habban moston;
Betwux
ðam ascuton þa awyrigedan gastas sume of þære
nywelnysse wið min. mid byrnendum eagum. and of heora muðe
and nosþyrlum stod stincende steam. and woldon me gelæccan
/ mid heora byrnendum tangum. ac hi ne mihton þurh godes gescyldnysse
me hreppan;
Efne
þa færlice æteowde min latteow swa swa scinende
steorra feorran fleogende and wið min onette;
Se
engel me lædde þærrihte to eastdæle on miccles
leohtes smyltnysse into anre byrig. þærbinnan wæs
swyðe smeðe feld and brad. mid blowendum wyrtum and grennysse
eal afylled. and mid beorhtran leohte þonne ænig sunne
scinende; Binnan þam weallum wæron ungerime meniu hwittra
manna on mycelre blisse;
Ic
ða betwux þam werodum þam engle fyligende. þohte
þæt hit wære heofonan ríce. ac min latteow
cwæð þæat hit swa nære;
He
lædde me ða gyt furðor. and ic geseah þær
ætforan us myccle mare leoht. and ic þær wynsume
stemne ormætes dreames gehyrde and wundorlices bræðes
swæc of ðære stowe utfleow; Hwæt ða min
latteow lædde me ongean to þære blostmbæran
stowe. and me befran hwæðer ic wyste / hwæt þa
þing wæron þe ic gesewen hæfde;
Ic
cwæð þæt ic nyste; He andwyrde and cwæð;
Seo mycele byrnende dene þe þu ærest gesawe is witnungstow.
on þære beoð þæra manna sawla gewitnode
and geclænsode. þe noldon heora synna þurh andetnysse.
and dædbote gerihtlæcan. on gehalum þingum. hæfdon
swa þeah behreowsunge æt heora endenextan dæge.
and swa gewiton mid þære behreowsunge of worulde. and
becumað on domes dæge ealle to heofonan rice;
Eac
hi sume þurh freonda fultum and ælmysdæda. and swyðost
þurh halige mæssan. beoð alysede. of ðam witum
ær þam mycclum dome;
Witodlice
seo swearte nywelnyss þe ðu gesawe mid þam ormætum
þeostrum and fulum] stence. seo is helle muð. and se ðe
æne þæron befylð. ne wyrð he næfre
on ecnysse ðanon alysed;
þeos
wynsume and ðeos blostmbære stow. is ðæra sawla
wunung ðe on gódum weorcum geendodon. and swa ðeah
næron swa fulfremede þæt hí ðærrihte
moston into heofenan rice. ac swa ðeah hí ealle becumað
to cristes gesihðe. and myrhðe. æfter ðam micclum
dome;
Witodlice
ða ðe fulfre-/mede beoð on geðohte. on worde. on weorce
swa hráðe swa hí of worulde gewitað. swa becumað
hí to heofenan rice; Of ðam ðu gesawe þæt
micele leoht mid ðam wynsumum bræðe. and þonon
ðu gehyrdest ðone fægeran dream;
þu
soðlice. nu ðu to lichaman gecyrst. gif ðu wylt ðine
dæda and ðeawas gerihtlæcan. ðonne underfehst
ðu æfter forðsiðe þas wynsuman wununge. þe
ðu nú gesihst;
Ða
ða ic ðe ana forlét on ðam ðeostrum. to ðy
ic dyde swa. þæt ic wolde witan ymbe ðin fær.
hu se ælmihtiga embe ðe wolde;