Blickling
Homily X - The End of the World is near |
|
|
|
|
|
Eala
men ða leofostan, hwæt we sceolan geðencean þæt we ne lufian to swyþe
þæt þæt we forlæton sceolan, ne þæt huru ne forlætan to swiþe þæt
we ecelice habban sceolan.
|
|
|
Geseo
we nu forgeorne þæt nænig man on worlde toðæs mycelne welan nafað, ne
toðon modelico gestreon her on worlde þæt se on medmycclum fyrste to ende
ne cume, & þæt eall forlæteð þæt him ær her on worlde wynsumlic wæs, &
leofost to agene & to hæbbene; & se man næfre toðon leof ne bið his nehmagum
& his worldfreondum, ne heora nán hine to þæs swiþe ne lufað þæt he sona
syþþan ne sý onscungend, seoþþan se lichoma & se gast gedælde beoþ, &
þincð his neawist laþlico & unfæger. |
|
|
Nis
þæt nan wundor; hwæt biþ hit la elles buton flæsc seoððan se ecea dæl
ofbiþ, þæt is seo sawl? hwæt biþ la elles seo láf buton wyrma mete? Hwær
beoþ þonne his welan & his wista? hwær beoð þonne his wlencea & his anmedlan?
hwær beoþ þonne his idlan gescyrplan? hwær beoþ ðonne þa glengeas & þa
mycclan gegyrelan þe he Iþone lichoman ær mid frætwode? hwær cumaþ þonne
his willan & his fyrenlustas ðe he her on worlde beeode? Hwæt he þonne
sceal mid his saule anre Gode ælmihtigum riht agyldan, ealles þæs þe he
her on worlde to wommum gefremede. |
|
|
Magon
we nun geheran [secg]gean be [sumum welegum men ]
& worldricum; ahte he on þysse worlde mycelne welan & swiðe modelico gestreon
& manigfealde, & on wynsumnesse lifde. |
|
|
Þa gelamp him þæt his líf wearð geendod, & færlic ende onbecom þisses
lænan lifæs; þa wæs his néhmaga sum & his worldfreonda þæt hine swyþor
lufode þonne ænig oþor
man, he þa for þære langunga & for þære geomrunga þæs oþres deaþes leng
on þam lande gewunian ne mihte; ac he unrotmód of his cyþþe gewát & of
his earde, & on þæm lande feala wintra wunode, & him næfre seo langung
ne geteorode, ac hine swiþe gehyrde & þreade. |
|
|
Þa
ongan hine eft langian on his cyþþe, forþon þæt he wolde geseon eft &
sceawian þa byrgenne, hwylc se wære þe he oft ær mid wlite & mid wæstmum
fægerne m[…. ]
geseah; him þa tocleopodan þæs deadan bán, & þus cwædon, 'Forhwon come
þu hider us to sceawigenne? |
|
|
Nu
þu miht her geseon moldan dæl & wyrmes láfe, þær þu ær gesawe godweb mid
golde gefagod. Sceawa þær nu dust & dryge bán, þær þær þu ær gesawe æfter
flæsclicre gecynde fægre leomu on to seonne. Eala þu freond & mín mæg,
gemyne þis & ongyt þe sylfne, þæt þu eart nu þæt ic wæs ió; & þu byst
æfter fæce þæt ic nu eom; gemyne þis & oncnaw þæt mine welan þe ic ió
hæfde syndon ealle gewitene & gedrorene, & mine herewíc syndon gebrosnode
& gemolsnode. Ac onwend þe to þe sylfum & þine heortan to ræde gecyr &
geearna þæt þine bena sýn Gode ælmihtigum andfenge.' |
|
|
He þa swa geomor, & swa gnorngende, gewát from þære dustsceawunga & hine
þa onwende from ealre þisse worlde begangum, & he ongan godes lof leornian
& þæt læran, & þæt gastlice mægen lufian; & þurh þæt geearnode him þa
gife Haliges Gastes, & eac þæs oþres saule of wítum generede, & of tintregum
alesde. |
|
|
Magon we þonne, men þa leofestan, us þis to gemyndum habban, & þás bysene
on urum heortum staþelian, þæt we ne seolan lufian worlde glengas to swiþe
ne þysne middangeard; forþon þe þeos world is eall forwordenlic & gedrofenlic
& gebrosnodlic & feallendlic, & þeos world is eall gewiten.
|
|
|
Uton
we þonne geornlice geþencean & oncnawan be þyses middangeardes fruman,
þa he ærest gesceapen wæs, þa wæs he ealre fægernesse full, & he wæs blowende
on him sylfum on swyþe manigfealdre wynsumnesse, & on þa tíd wæs mannum
leóf ofor eorþan, & halwende & héal smyltnes wæs ofor eorþan, & sibba
genihtsumnes, & tuddres æþelnes; & þes middangeard wæs on þa tíd toþon
fæger & toþon wynsumlic,
þæt he teah men to him þurh his wlite & þurh his fægernesse & wynsumnesse
fram þon ælmihtegan Gode; & þa he þus fæger wæs & þus wynsum, þa wisnode
he on Cristes haligra heortum, & is nu on urum heortum blowende swa hit
gedafen is. |
|
|
Nu
is æghwonon hream & wóp, nu is heáf æghwonon, & sibbe tolesnes, nu is
æghwonon yfel & slege, & æghwonon þes middangeard flyhþ from us mid mycelre
biternesse, & we him fleondum fylgeaþ & hine feallendne lufiaþ. |
|
|
Hwæt
we on þam gecnawan magon þæt þeos world is scyndende & heononweard. |
|
|
Uton
we þonne þæs geþencean, þa hwile þe we magon moton, þæt we us georne to
gode þydon. |
|
|
Uton
urum Drihtne hyran georne, & him þancas secggan ealra his geofena, & ealra
his miltsa, & ealra his eaðmódnessa & fremsumnessa þe he wiþ us æfre gecyþde,
þæm heofonlican Cininge þe leofað & rixaþ on worlda world áá buton ende
on ecnesse. AMEN |
|
|
|
|
|
|